Síðastliðinn þriðjudag óskaði lögreglan á Suðurlandi eftir aðstoð þyrlusveitar Landhelgisgæslunnar vegna ferðamanns sem var í vanda á Sprengisandsleið. Ferðamaðurinn hafði verið veðurtepptur á staðnum í þrjá daga og sendi því frá sér neyðarboð.
Björgunarsveitir á vegum Slysavarnafélagsins Landsbjargar voru kallaðar út ásamt áhöfninni á TF-GNA, þyrlu Landhelgisgæslunnar. Vel gekk að finna ferðamanninn, sem hafði gefið viðbragðsaðilum upp staðsetningu sína með GPS-hnitum.
Áhöfnin á TF-GNA aðstoðaði manninn við að taka saman búnað sem hann hafið meðferðis og viðkomandi var fluttur með þyrlunni til Reykjavíkur. Ferðamaðurinn hafði verið í rúmar tvær vikur á ferðalagi en setið fastur á Sprengisandsleið í þrjá daga eins og áður segir.
Vikan hjá þyrlusveitinni hefur verið nokkuð annasöm en útköllin eru níu talsins og um leið og þyrlan lenti með ferðamanninn í Reykjavík hóf hún strax undirbúning vegna útkalls sem barst vegna veikinda í Vestmannaeyjum.