Síðastliðinn laugardag hélt CrossFit Selfoss styrktaræfing til styrktar Krabbameinsfélagi Árnessýslu.
Fyrir æfinguna gafst fólki einnig kostur á að kaupa boli með áletruninni „CrossFit gegn krabbameini“. Bolurinn gilti sem aðgöngumiði á styrktaræfinguna en einnig gat fólk keypt bol án þess að mæta á æfinguna. Alls söfnuðust 319.500 kr.
120 bolir seldir
Sigrún Arna Brynjarsdóttir, yfirþjálfari og stöðvarstjóri í CrossFit Selfossi, segir í samtali við sunnlenska.is að salan á bolunum hafi gengið frábærlega og séu þau búin að selja um 120 boli.
„Ég bjó í Noregi í sex ár og átti og rak þar CrossFit stöð. Í Noregi var búið að starta svona verkefni og þar sem þetta málefni stendur mér ansi nærri langaði mig til þess að gera þetta hér heima líka.“
Um 70 manns tóku þátt
Sigrún Arna segir að þeim hafi fundist góð hugmynd af hafa styrktaræfingu í bleikum október.
„Við vorum með liðaæfingu, þrjú saman í liði og það mættu um 70 manns og tóku æfinguna saman. Fjörutíu og fimm af þeim sem mættu á æfinguna er fólk sem æfir hjá okkur CrossFit en svo var restin fólk sem æfir annars staðar en vildi taka þátt í þessu með okkur – sem er yndislegt. Enda var þetta alls ekki hugsað bara fyrir okkar iðkendur, hreyfing er forvörn gegn krabbameini og því vel við hæfi að hittast og hreyfa sig í nafni góðs málefnis.“
Árlegur viðburður
Sigrún Arna segir að þau hafi ekki verið með neitt ákveðið markmið hvað varðar söfnunina. „Í raun var markmiðið bara að safna sem mestu. Á næsta ári ætlum við að reyna finna fyrirtæki sem er til í að taka þátt í þessu með okkur, mögulega í formi þess að borga kostnað við bolina. Þá getum við gefið enn stærri upphæð.“
„Mig langar að þakka öllum þeim sem tóku þátt á einn eða annan hátt. Sérstakar þakkir til Brunavarna Árnessýslu en strákarnir þar mættu og tóku æfinguna með okkur í fullum búnaði. Það var hægt að heita á þá og leggja inn á málstaðinn. Þeir gáfu öllum bleik buff og endurskinsmerki í staðinn. Það voru góðar undirtektir og margir sem lögðu inn á reikninginn. Við vonumst til að sjá enn fleiri með á næsta ári, það var einróma ákvörðun um að þetta yrði árlegt,“ segir Sigrún Arna að lokum.