Björgunarfélagið á Höfn og Björgunarsveitin Kári í Öræfum voru kallaðar út á sjötta tímanum í dag þegar beiðni barst um aðstoð á Hvannadalshnjúk vegna göngumanns er veiktist á leið sinni niður af tindinum.
Var hann þá staddur, ásamt gönguhópi, í um 1.800 m hæð.
Þyrla Landhelgisgæslunnar var einnig kölluð á staðinn.
Björgunarmenn fóru á Hnjúkinn á sleðum auk þess sem fjórir göngumenn fóru frá Sandfelli.
Þyrlan kom á slysstað rétt fyrir klukkan 19 og flutti manninn á sjúkrahús í Reykjavík.
Ekki er vitað um ástand hans en læknir var í gönguhópnum og sinnti manninum þar til aðstoð barst.
Gott veður var á Hvannadalshnjúki í dag, heiðskýrt efst en skýjað neðar.