Lögreglan var kölluð út snemma í morgun að veitingastað við Austurveg á Selfossi þar sem brotist hafði verið inn í gistiaðstöðu starfsmanna.
Sá er braust inn var enn á staðnum þegar lögreglan kom á vettvang og var vopnaður hníf. Hann hafði skorið húsráðanda í aðra höndina þegar sá síðarnefndi ætlaði að stöðva för hans.
Lögreglumenn handtóku gerandann á staðnum og var hann fluttur í fangageymslu, en húsráðandi var fluttur á sjúkrahús til meðhöndlunar á skurðsári.
Vegna aðbúnaðar á staðnum hafði lögregla samband við Heilbrigðiseftirlit Suðurlands og Brunavarnir Árnessýslu sem komu á staðinn og ákváðu að loka á starfsemi veitingastaðarins tímabundið. Staðurinn var innsiglaður og var lögreglumaður á vakt við húsið fram eftir degi.
Rannsókn málsins er enn í gangi hjá lögreglunni á Suðurlandi.