Yfirgnæfandi meirihluti félaga BSRB í sex sveitarfélögum, þar á meðal Árborg, Ölfusi og Hveragerði, samþykkti boðun verkfalls í atkvæðagreiðslum sem lauk nú á hádegi.
Verkfallsboðun þessi nær til starfsfólks leik- og grunnskóla, frístundaheimila, mötuneyta og hafna í sveitarfélögunum. Í Árborg samþykktu 87,69% verkfallsboðun, 90,91% í Ölfusi og 91,55% í Hveragerði.
„Félagsfólk okkar virðist hafa verið löngu tilbúið í verkföll, fólk ætlar ekki að láta þetta misrétti yfir sig ganga ofan á allt og er tilbúið til að leggja niður störf til að knýja fram réttláta niðurstöðu“ segir Sonja Ýr Þorbergsdóttir, formaður BSRB, um kosninguna. „Sveitarfélögin hafa þó enn tækifæri til að sjá að sér og koma til móts við starfsfólk sitt en hingað til hefur samningsviljinn verið enginn,“ sagði Sonja.
Yfir 1.500 BSRB félagar leggja því að óbreyttu niður störf í maí og júní hjá tíu sveitarfélögum. Ljóst er að verkföllin munu hafa veruleg áhrif á leik- og grunnskóla, frístundarmiðstöðvar og hafnarstarfsemi.