Björgunarsveitir á Suðurlandi voru kallaðar út í nótt til aðstoðar ferðafólki á þjóðvegi 1, við Pétursey. Þar var orðin talsverð ófærð og nokkur fjöldi bíla fastur.
Yfir 50 manns var komið til bjargar á þessum slóðum, um 30 voru fluttir á fjöldahjálparstöð sem opnuð var í Vík í Mýrdal, og öðrum var komið fyrir í annarri gistingu. Einhverjir gátu haldið áfram för, en veður austan Víkur var skaplegra.
Um klukkan fimm í morgun hafði öllum verið komið til aðstoðar og björgunarfólk hélt heim. Fjöldi bíla var hins vegar skilinn eftir við Pétursey og verkefni morgunsins hefur verið að koma fólki aftur að bílunum og losa þá.
Suðurlandsvegur er lokaður milli Skóga og Víkur og eins er lokað í Öræfum. Gul viðvörun er í gildi á svæðinu fram eftir morgni.
