Andri Már Óskarsson, Golfklúbbi Selfoss, lék frábært golf í dag á þriðja degi Íslandsmótsins í golfi sem fram fer á Hlíðavelli í Mosfellsbæ um helgina.
Andri Már jafnaði vallarmetið á Hlíðavelli og lék á 66 höggum, eða sex höggum undir pari. Hann fékk sjö fugla á hringnum og einn skolla. Andri Már lyfti sér upp um fjórtán sæti í dag og er nú í 7.-8. sæti en lokahringurinn verður leikinn á morgun.
Fleiri liðsmenn Golfklúbbs Selfoss léku gott golf í dag. Aron Emil Gunnarsson fór hringinn á fjórum höggum undir pari og er í 21.-22. sæti og Pétur Sigurdór Pálsson lék á tveimur höggum undir pari og er í 44.-48. sæti.
Eftir erfiða byrjun á mótinu lék gamla brýnið Hlynur Geir Hjartarsson annan hringinn í röð á pari vallarins og lyfti sér upp í 25.-31. sæti.
Í kvennaflokki lék Heiðrún Anna Hlynsdóttir sinn besta hring á mótinu í dag en hún spilaði á þremur höggum yfir pari og lyfti sér upp í 7. sætið.
Vegna samkomutakmarkana og tveggja metra reglunnar hvetur mótsstjórn Íslandsmótsins áhugafólk til þess að fylgjast með lokadegi mótsins í beinni útsendingu í Ríkissjónvarpinu en útsendingin hefst klukkan 14:00 á morgun, sunnudag.
