Franska knattspyrnuliðið Le Havre AC hefur keypt miðvörðinn Önnu Björk Kristjánsdóttur frá knattspyrnudeild Selfoss.
„Ég er virkilega spennt fyrir að komast í svona sterka deild og tel það algjör forréttindi að fá að keppa á móti nokkrum af bestu liðum og leikmönnum í heimi. Þetta er spennandi áskorun og það hefur alltaf verið draumur minn að spila og búa í Frakklandi,“ segir Anna Björk í samtali við sunnlenska.is.
„Mér líst vel á þetta og hef heyrt góða hluti frá Berglindi Björgu og þeim sem eru í kringum liðið. Það er ekki langt síðan kvenna liðið var stofnað en hefur tekið miklum framförum á stuttum tíma og ég hlakka til að gera mitt besta til að hjálpa liðinu að ná sem besta árangri. Mig langar líka til þess að þakka Selfyssingum fyrir stuttan en gefandi tíma og það er virkilega erfitt að kveðja á þessum tímapunkti. En ég er þakklát Selfyssingum fyrir að standa við bakið á mér og hjálpa mér að grípa þetta tækifæri,“ segir Anna Björk ennfremur.
Anna Björk kom til Selfoss frá PSV í Hollandi í vor og lék fimmtán leiki með Selfyssingum í deild og bikar en hún hefur verið lykilmaður í vörninni hjá Selfyssingum sem eru í 4. sæti úrvalsdeildarinnar og komnir í undanúrslit í bikarkeppninni.
Anna Björk er annar leikmaðurinn sem kveður Selfoss í þessari viku en Hólmfríður Magnúsdóttir flaug til Noregs í morgun og mun ljúka tímabilinu hjá Avaldsnes í norsku úrvalsdeildinni.
Anna mætir Grace og Söru
Keppni í frönsku deildinni hófst í byrjun september. Anna Björk verður liðsfélagi Berglindar Bjargar Þorvaldsdóttur hjá Le Havre en meðal annarra leikmanna í deildinni eru Grace Rapp, fyrrum leikmaður Selfoss, sem leikur með Stade de Reims og landsliðsfyrirliðinn Sara Björk Gunnarsdóttir sem er á mála hjá Evrópumeisturum Lyon.
