Árborg tók á móti Tindastól í 4. deild karla í knattspyrnu í dag. Bæði lið þurftu á sigri að halda til þess að stimpla sig inn í toppbaráttuna.
Hvorugu liðinu varð þó að ósk sinni því leiknum lauk með 1-1 jafntefli. Fyrri hálfleikurinn var markalaus þrátt fyrir góðar sóknir beggja liða.
Þegar korter var liðið af seinni hálfleiknum komst Tindastóll yfir en rúmum tíu mínútum síðar jafnaði Elvar Orri Sigurbjörnsson fyrir Árborg og lengra komust liðin ekki.
Tindastóll og Árborg eru í 3.-4. sæti deildarinnar með 12 stig en Stólarnir eiga einn leik til góða.