Frábær aðsókn var í 40 ára afmælishlaup Reykjavíkurmaraþons sem haldið var síðastliðinn laugardag í björtu og fallegu veðri. Skráðir þátttakendur voru 14.646 sem eru rúmlega 3.000 fleiri en á síðasta ári.
Arnar Þór Ingólfsson, Þór Þorlákshöfn, setti nýtt HSK-met í maraþoni í karlaflokki, en hann hljóp á 2:56:52 klst í Reykjavíkurmaraþoninu. Sigursveinn Sigurðsson, Selfossi, átti gamla metið, en hann hljóp á 2:59:14 klst í Kaupmannahöfn í vor.
Arnar Þór varð í 29. sæti í karlaflokki í hlaupinu og var tíundi Íslendingurinn í mark. Það er gaman að segja frá því að þetta er í fyrsta skipti sem Arnar Þór hleypur heilt maraþon og þegar hann hóf hlaupaæfingar síðasta vetur var það langtímamarkmið hjá honum að hlaupa undir þremur klukkustundum. Nú þarf að setja ný markmið!
Árangur Arnars er einnig HSK met í flokki 30-34 ára, en metið í þeim flokki átti Grétar Snorrason og var 3:17:43 klst, sett árið 2013.
Annað HSK met í eldri aldursflokkum var bætt á laugardaginn. Sigurður Júlíusson, Selfossi, bætti metið í hálfmaraþoni í flokki 40-44 ára. Hann kom í mark á 1:25:12 klst og bætti þar með 23 ára gamalt met Ingvars Garðarssonar um 59 sekúndur.
Ingvar alltaf með
Fjölmargir Sunnlendingar tóku þátt í hlaupinu. Þeirra á meðal Skeiðamaðurinn Ingvar Garðarsson sem búsettur er á Selfossi. Hann hefur tekið þátt í þessum viðburði árlega í þau 40 ár sem hlaupið hefur verið haldið. Aðeins tveir hlauparar hafa alltaf tekið þátt í hlaupinu. Hinn er Jón Guðmundsson og nú hlupu þeir saman í fyrsta skipti alla leið í 10 km hlaupinu, í tilefni þessara tímamóta.
