Hlaupahópurinn Frískir Flóamenn á Selfossi heldur utanvegahlaupið Bakgarðspíslina í fjórða sinn í Hellisskógi á föstudaginn langa, þann 18. apríl næstkomandi.
Bakgarðspíslin er viðburður í anda bakgarðshlaupanna sem notið hafa mikilla vinsælda á undanförnum árum. Bakgarðspíslin er með smærra sniði eða þannig að hlaupin er 1 míla (1,67 km) á hverjum 15 mínútum. Ræsing er því á korters fresti og þurfa þátttakendur að skila sér í mark innan 15 mínútna til að mega leggja af stað í næstu ræsingu.
Fyrsta ræsing er kl. 8:00 við Grímskletta og síðasta ræsing er kl. 15:30 en þeir sem hlaupa allan tímann geta hlaupið um 50 km. Nánari upplýsingar má finna á Facebook síðu hlaupahópsins þegar nær dregur hlaupi.
Styrktaraðilar hlaupsins eru Íslenska gámafélagið og Almar bakari og þá hefur Sigmundur Stefánsson útbúið þátttökupeninga úr trjám úr Hellisskógi.
Fyrirlestur með Andreu og Þorsteini
Fleira er framundan hjá Frískum Flóamönnum en þriðjudaginn 29. apríl næstkomandi verður fyrirlestur í félagsheimilinu Tíbrá kl. 19:30 þar sem Andrea Kolbeinsdóttir og Þorsteinn Roy Jóhannsson, landsliðsfólk í utanvegahlaupum mæta og segja frá sinni reynslu og afrekum.
Frískur hlaupahópur fyrir byrjendur sem lengra komna
Frískir Flóamenn er hlaupahópur á Selfossi og sem hefur verið starfræktur í tæp 30 ár. Æfingar eru á þriðjudögum og fimmtudögum kl. 17:15 og á laugardögum kl. 9:10. Æfingar hefjast allar við Sundhöll Selfoss og ókeypis. Þjálfari er Þórfríður Soffía Haraldsdóttir, sjúkraþjálfari. Hún setur inn upplýsingar á Facebooksíðu hlaupahópsins, um fyrirhugaða æfingu með dags fyrirvara og þá er hægt að sjá hvernig æfingin verður. Æfingar eiga að henta bæði byrjendum og lengra komnum og eru allir áhugasamir hjartanlega velkomnir.
Stærsta verkefni Frískra Flóamanna ár hvert er vinna við Laugavegshlaupið sem haldið verður 12. júlí næstkomandi. Þar verða um 40 manns úr hlaupahópnum í sjálfboðavinnu við brautarvörslu og drykkjarstöðvar á hlaupaleiðinni frá Landmannalaugum í Þórsmörk. Þetta verkefni gerir Frískum kleift að bjóða uppá gjaldfrjálsar æfingar með þjálfara, áhugaverða fræðslu og skemmtilega viðburði.