Knattspyrnukonan Bergrós Ásgeirsdóttir frá Selfossi hefur söðlað um og gengið í raðir svissneska úrvalsdeildarliðsins FC Aarau frá ítalska B-deildar félaginu Arezzo.
„Mér líst mjög vel á aðstæður hér í Sviss, bæði stelpurnar og þjálfarateymið og við erum spenntarfyrir því að hefja deildarkeppnina. Við eigum fyrsta leik 10. ágúst og höfum verið á fullu á undirbúningstímabilinu seinustu vikur,“ sagði Bergrós í samtali við sunnlenska.is. Heimavöllur FC Aarau er í Aarau, rúmlega 21 þúsund manna bæ 40 km austan við Zurich.
Úr ökklalið á Ítalíu
Bergrós gekk í raðir Arezzo á Ítalíu síðasta haust og lék 17 leiki með félaginu í Serie-B síðasta vetur. Tímabilið varð reyndar endasleppt hjá henni því hún varð fyrir því óláni að fara úr ökklalið snemma í apríl.
„Svo fékk ég þetta tækifæri í Sviss núna í sumar og ákvað að stökkva á það. Ég er komin svona 70% til baka eftir meiðslin en ég er mjög heppin með sjúkraþjálfun hérna í Sviss þannig að þetta er allt að koma til,“ sagði Bergrós ennfremur.
Bergrós, sem er 27 ára gömul, fór upp yngri flokkana á Selfossi og hefur leikið 145 leiki í vínrauða búningnum, þar af 90 í efstu deild.