Íþróttir

Bjarni íþróttamaður Bláskógabyggðar 2017

22. janúar 2018 12:39

Bjarni Bjarnason var útnefndur íþróttamaður Bláskógabyggðar í þriðja sinn í hófi sem haldið var til heiðurs íþróttamönnum sveitarfélagsins í síðustu viku.

Æskulýðsnefnd Bláskógabyggðar bauð til hófsins en það var að þessu sinni haldið í íþróttahúsinu á Laugarvatni og þótti það vel við hæfi þar sem Bláskógabyggð tók við rekstri þess á árinu 2017.

Tveir knapar voru tilnefnir til íþróttamanns ársins, Bjarni Bjarnason, ættaður frá Þóroddsstöðum, en hann er félagi í Hestamannafélaginu Trausta og Rósa Kristín Jóhannesdóttir frá Brekku sem keppir fyrir Hestamannafélagið Loga.

Bjarni hlaut titilinn í ár en þetta er í þriðja sinn sem hann er valinn íþróttamaður Bláskógabyggðar. Árangur Bjarna á árinu 2017 náði ekki þeim hæðum sem á fyrri árum enda kannski ekki hægt að fara fram á heimsmet á ári hverju. Bjarni átti samt farsælan feril í skeiðkeppni á árinu varð meðal annars í 3. sæti í 100m skeiði á Íslandsmótinu og í 1. sæti í 250 m skeiði á Suðurlandsmótinu.

Í verðlaunahófinu fengu tvær hlaupakonur úr Laugdælum verðlaun fyrir góðan árangur á árinu 2017 þær Agnes Erlingsdóttir og Lára Björk Pétursdóttir en báðar urðu þær bikarmeistarar í 1500m hlaupi, Agnes í fullorðinsflokki og Lára Björk í Bikarkeppni 15 ára og yngri.

Þá ákvað Æskulýðsnefnd að veita sameiginlegu liði skóla Bláskógaskóla í Reykholti og á Laugarvatni sérstaka viðurkenningu fyrir góðan árangur í Skólahreysti – Suðurlandsriðli á árinu 2017 en liðið varð i 3. sæti í keppninni. Þau sem skipuðu liðið eru Anthony Karl Flores, Sölvi Freyr Jónasson, Lára Björk Pétursdóttir og Jóna Kolbrún Helgadóttir en þess má geta að þau eru öll miklir íþróttamenn, með bakgrunn úr hinum ýmsu íþróttagreinum.

Anthony Karl, Jóna Kolbrún, Sölvi Freyr og Lára Björk stóðu sig vel í Skólahreysti.