Íslenska kvennalandsliðið í knattspyrnu vann 1-0 sigur gegn Norður Írlandi í fyrsta leik liðsins á Pinatar Cup æfingamótinu á Spáni í dag.
Dagný Brynjarsdóttir, leikmaður Selfoss, skoraði eina mark leiksins á 24. mínútu þegar fyrirgjöf hennar frá hægri sveif yfir markvörð Norður-Íranna og í netið.
Bæði lið fengu fleiri færi í leiknum og Norður-Írarnir sóttu nokkuð stíft undir lokin en íslenska liðið stóðst pressuna.
Liðið mætir Skotlandi í næsta leik á laugardag og Úkraínu á þriðjudag.