Selfyssingurinn Þórir Hergeirsson stýrði norska kvennalandsliðinu í handbolta til sigurs á Evrópumeistaramótinu í dag í fjórða skiptið.
Noregur vann ríkjandi Evrópumeistara Frakka 22-20 í úrslitaleiknum. Noregur leiddi 14-10 í hálfleik en Frakkar jöfnuðu 17-17 og lokakaflinn var æsispennandi. Noregur hafði betur að lokum og vann því alla átta leiki sína á mótinu.
Afrekaskrá Þóris með norska landsliðið heldur því áfram að lengjast en þetta eru sjöundu gullverðlaun hans sem aðalþjálfari norska liðsins.
Þórir tók við liðinu í apríl 2009 og síðan þá hefur liðið unnið gullverðlaun á EM 2010, HM 2011, Ólympíuleikunum 2012, EM 2014, HM 2015, EM 2016 og nú EM 2020. Þá á liðið hans Þóris einnig silfurverðlaun frá EM 2012 og HM 2017 og bronsverðlaun frá HM 2009 og Ólympíuleikunum 2016.