Nú á dögunum skrifuðu þeir Þormar Elvarsson, Jökull Hermannsson, Guðmundur Axel Hilmarsson og Guðmundur Tyrfingsson undir samninga við knattspyrnudeild Selfoss.
Allir eru þessi leikmenn að hefja undirbúningstímabil undir stjórn Dean Martin þjálfara meistaraflokks karla.
Þormar er fæddur árið 2000 og á þrettán leiki fyrir Selfoss en hann kom ungur til liðsins frá KFR. Jökull er fæddur árið 1998 og hefur verið viðloðandi meistaraflokkinn í nokkur ár og á sex leiki í deild og bikar fyrir liðið.
Guðmundur Axel er fæddur árið 2001, en hann spilaði stórt hlutverk í meistaraflokknum á síðsta tímabili þrátt fyrir ungan aldur og var valinn bæði besti og efnilegasti leikmaður félagsins á lokahófinu í haust. Guðmundur Axel hefur einnig spilað leiki með U17 og U18 ára liðum Íslands síðustu ár.
Guðmundur Tyrfingsson er fæddur árið 2003, en hann steig sín fyrstu skref í deildarkeppni í meistaraflokki undir lok síðasta tímabils. Hann hefur einnig leikið með yngri landsliðum Íslands.
Í tilkynningu frá knattspyrnudeildinni er þessum samningum fagnað og er vænst til að þessir leikmenn verði partur af sterkri liðsheild næstu árin.