![Embla Dís Gunnarsdóttir](https://www.sunnlenska.is/wp-content/uploads/2024/07/Embla-Dis-Gunnarsdottir-696x451.jpg)
Útlitið batnaði ekki hjá Selfyssingum í 1. deild kvenna í knattspyrnu í kvöld en liðið tapaði gegn Fram á heimavelli í sannkölluðum botnslag.
Liðin voru í 8. og 9. sæti fyrir leik en með sigri hefði Selfoss getað jafnað Fram að stigum. Þær vínrauðu fóru ágætlega af stað í kvöld en eftir fimmtán mínútna leik tóku Framarar leikinn algjörlega yfir. Þeim tókst þó ekki að skora og staðan var 0-0 í hálfleik.
Framarar voru sterkari í seinni hálfleiknum og þær komust yfir á 67. mínútu með skallamarki Murielle Tiernan eftir fyrirgjöf frá vinstri. Á 80. mínútu gerðu gestirnir svo úr um leikinn og nú var það Alda Ólafsdóttir sem skallaði boltann í netið af stuttu færi – aftur eftir fyrirgjöf frá vinstri.
Embla Dís Gunnarsdóttir fékk besta færi Selfyssinga í uppbótartímanum þegar hún átti skalla að marki en Framarar björguðu á línu. Lokatölur 0-2.
Selfoss er áfram í 9. sæti deildarinnar, með 9 stig en Fram lyfti sér með sigrinum upp í 6. sætið með 15 stig.