Laugavegshlaupið fór fram við góðar aðstæður laugardaginn 16. júlí síðastliðinn. Eins og venjulega voru Frískir Flóamenn í stóru hlutverki í hlaupinu, bæði sem starfsmenn og að sjálfsögðu sem keppendur.
Rúmlega 40 starfsmenn frá Frískum Flóamönnum á Selfossi unnu við hlaupið og sáu um drykkjarstöðvarnar í Hrafntinnuskeri, Álftavatni, Söndum, Emstrum, Ljósá og Þröngá. Auk þess fóru eftirfarar á eftir hlaupurum frá Landmannalaugum.
Sjö hlauparar frá Frískum Flóamönnum tóku þátt í hlaupinu að þessu sinni og skiluðu sér allir heilir í mark í Húsadal. Þau sem hlupu voru; Steingerður Hreinsdóttir á tímanum 7:12,14 klst, Þórfríður Soffía Haraldsdóttir á tímanum 7:40,01 klst, Lingþór Jósepsson á 7:15,17 klst, Bárður Árnason á 7:40,32 klst, Þorsteinn Tryggvi Másson á 7:46,33 klst, Vigfús Eyjólfsson á 8:49,15 klst og Almar Þór Þorgeirsson á 8:58,53 klst. Steingerður og Þorsteinn voru að hlaupa sitt tíunda Laugavegshlaup og fengu viðurkenningar fyrir það.
Björgunarfélag Árborgar sá um að flytja fólk og búnað á allar stöðvar og sáu um öryggisgæslu og þjónustu við Bláfjallakvísl en vinna við Laugavegshlaupið er samkvæmt samstarfssamningi ÍBR við Fríska Flóamenn og Björgunarfélag Árborgar. Í tilkynningu frá Frískum Flóamönnum segir að þessi fjáröflun geri hlaupahópnum kleift að æfa án æfingagjalda og eru allir áhugasamir hlauparar hvattir til að mæta á æfingar sem eru alla þriðjudaga og fimmtudaga kl. 17:15 og kl. 9 á laugardögum.
Sif stórbætti HSK metið
Eitt HSK met var sett í hlaupinu. Sif Árnadóttir, Umf. Selfoss, kom í mark á 5:34,32 sem er héraðsmet í kvennaflokki. Hún stórbætti þar met Söruh Seeliger, sem var 6:26,07 klst. Sif varð í 4. sæti í kvennaflokki í hlaupinu og önnur í flokki 18-29 ára.
