Uppskeruhátíð Hestamannafélagsins Sleipnis á Selfossi var haldin í Þingborg við hátíðlega athöfn síðastliðið laugardagskvöld.
Fjöldi verðlauna voru veitt á uppskeruhátíðinni. Bestu tíma í skeipgreinum áttu Sigursteinn Sumarliðason á Krókusi frá Dalbæ í 250 m skeiði á tímanum 21,35 sek sem jafnframt var besti tími ársins. Sigursteinn og Krókus áttu einnig besta tímann í 100 m skeiði 7,33 sek og í 150 m skeiði var það Larissa Silja Werner á Hyl frá Kjarri á tímanum 14,97 sek.
Ræktunarbikar Sleipnis, sem kemur í hlut hæst dæmda kynbótahrossi ársins sem ræktað er af Sleipnisfélaga, hlaut Safír frá Laugardælum en ræktandi hans er Malin Linnea Birgitta Widar. Safír hlaut 8,81 í aðaleinkunn í flokki 5. vetra stóðhesta á Landsmóti hestamanna í Reykjavík.
Sérstakar viðurkenningar á uppskeruhátíðinni hlutu Sigursteinn Sumarliðason, Íslandsmeistari í 250 m skeiði á Krókusi frá Dalbæ, Guðmunda Ellen Sigurðardóttir, Íslandsmeistari í fjórgangi meistaraflokki á Flaumi frá Fákshólum og Védís Huld Sigurðardóttir, sem varð Norðurlandameistari í fimmgangi ungmenna á Búa frá Húsavík.
Félagar ársins hjá Sleipni eru Stefán Bjartur Stefánsson og Linda Rut Ragnarsdóttir, Klárhestaskjöldurinn kom í hlut Þrastar frá Kolsholti og Sleipnisskjöldinn hlaut Kolbeinn frá Hrafnsholti.
Þá voru knapar ársins verðlaunaðir og má sjá greinargerðir um þá hér fyrir neðan.
Íþróttaknapi ársins
Guðmunda Ellen Sigurðardóttir varð í 2. sæti í einstaklingskeppninni í 1. deildinni í hestaíþróttum, sigraði fimmgang og 2. sæti í fjórgangi í Suðurlandsdeildinni, var í 1.-2. sæti í fjórgangi og í B-úrslitum í slaktaumatölti á Reykjavíkurmótinu, varð Íslandsmeistari í fjórgangi meistaraflokki og í A-úrslitum í slaktaumatölti á sama móti.
Gæðingaknapi ársins
Helgi Þór Guðjónsson sigraði glæsilega B-flokk á gæðingamóti Sleipnis og endaði í 2. sæti í B-flokki gæðinga á landsmóti hestamanna þar sem munurinn var einungis 0,02 á 1. og 2. sæti.
Knapi ársins í ungmennaflokki
Védís Huld Sigurðardóttir sigraði einstaklingskeppnina í meistaradeild ungmenna, sigraði fimmgang ungmenna á WR íþróttamóti Sleipnis, var í þrennum A-úrslitum á Rreykjavíkurmeistaramótinu, sigraði ungmennaflokk á gæðingamóti Sleipnis, varð í 2. sæti í B-flokki ungmenna á landsmóti hestamanna og varð Norðurlandameistari í fimmgangi ungmenna.
Knapi ársins í flokki áhugamanna
Soffía Sveinsdóttir varð í 2. sæti í tölti og slaktaumatölti í áhugamannadeildinni, varð í 6. sæti í tölti í Suðurlandsdeildinni, 2. sæti í tölti á WR íþróttamóti Sleipnis og 4. sæti í fjórgangi á sama móti, 3. sæti í tölti á Reykjavíkurmeistaramótinu og endaði í 4. sæti í töltinu á gæðingamótinu á Flúðum þar sem hún var eini áhugamaðurinn í úrslitunum.
Knapi ársins hjá Sleipni
Sigursteinn Sumarliðason en hann átti frábært ár. Sigursteinn varð Íslandsmeistari í 250 m skeiði með besta tíma ársins á Krókusi frá Dalbæ, hann hlaut bronsverðlaun í 100 m skeiði á sama móti á sama hesti. Hann hlaut silfur í 100 m skeiði á landsmóti hestamanna og silfur í 250 m skeiði á sama móti á Krókusi frá Dalbæ. Eftir árið er Sigursteinn og Krókus frá Dalbæ í 2. sæti í íslenska stöðulistanum bæði í 250 og 100 m skeiði, hann er annar á alþjóðlega stöðulista FEIF í 250 m skeiði og áttundi á alþjóðlega stöðulistanum í 100 m skeiði.
