HSK sendi ungt lið til keppni á Bikarkeppni FRÍ sem fram fór í Kaplakrika í Hafnarfirði í dag. Lið HSK stóð sig með stakri prýði og endaði í 5. sæti í stigakeppninni en það var lið FH sem sigraði keppnina örugglega. Karlalið HSK endaði í 4. sæti og kvennaliðið í 6. sæti.
Hjálmar Vilhelm 28 cm frá lágmarki á EM-U18
Hjálmar Vilhelm Rúnarsson náði frábærum árangri þegar hann vann til silfurverðlauna í þrístökki með stökk upp á 13,82 m. Hjálmar stórbætti sig og var aðeins 5 cm frá sigri en stökkið var 28 cm frá lágmarki inn á Evrópumeistaramót 18 ára og yngri. Árangurinn er nýtt HSK met í flokki 16-17 ára en fyrra metið, sem var 13,60 m var 39 ára gamalt í eigu Jóns Arnars Magnússonar, frænda Hjálmars Vilhelms.
Örn sterkur í kúlunni
Örn Davíðsson kastaði kúlunni 14,53 m og fékk silfurverðlaun að launum og Ísold Assa Guðmundsdóttir stökk yfir 2,60 m í stangarstökki og vann til bronsverðlauna. Boðhlaupssveit karla náði silfurverðlaunum í 4×200 m hlaupi á stórgóðum tíma 1:37,06 mín. Sveitina skipuðu þeir Olgeir Otri Engilbertsson, Vésteinn Loftsson, Ívar Ylur Birkisson og Hjálmar Vilhelm Rúnarsson.
Aðrir keppendur HSK stóðu sig stórvel og skiluðu dýrmætum stigum í stigakeppni liðanna.
