Guðmundur Kr. Jónsson fyrrverandi iðkandi, þjálfari og formaður deildarinnar var útnefndur heiðursfélagi frjálsíþróttadeildar Umf. Selfoss á aðalfundi hennar í félagsheimilinu Tíbrá í vikunni.
Fjöldi fólks mætti á fundinn sem fór vel fram og kom fram í skýrslu formanns og ársreikningum að starf og rekstur deildarinnar er í miklum blóma. Iðkendum fjölgaði nokkuð á seinasta ári og árangur var góður, sér í lagi hjá yngri iðkendum deildarinnar.
Guðmundur Kr. var heiðraður sérstaklega fyrir farsælt og óeigingjarnt starf sitt fyrir deildina um áratuga skeið. Hann tók við viðurkenningunni úr hendi Helga S. Haraldssonar, formanns deildarinnar.
Stjórn deildarinnar var endurkjörin en hana skipa auk Helga þau Sólveig Guðjónsdóttir gjaldkeri, Þuríður Ingvarsdóttir ritari, Sigurður Ágúst Pétursson, Svanhildur Bjarnadóttir og Guðjón Sigfússon meðstjórnendur auk Thelmu Bjarkar Einarsdóttur fulltrúa iðkenda 16-25 ára.
Að loknum venjulegum aðalfundarstörfum voru iðkendur deildarinnar heiðraðir fyrir góða ástundun, framfarir og afrek síðasta árs.
Dominic Þór Fortes hlaut viðurkenningu fyrir þann íþróttamann sem hefur sýnt mjög góða ástundun hjá iðkendum 7 ára og yngri og í flokki 8-10 ára mætti Dýrleif Nanna Guðmundsdóttir best á æfingar en þetta er fimmta sumarið í röð sem hún mætir best í sínum aldursflokki.
Á liðnu sumri mættu Hildur Helga Einarsdóttir og Hjalti Snær Helgason mjög vel á æfingar hjá 11-14 ára iðkendum. Þessi ástundun skilaði þeim góðum árangri og bæði bættu sig mikið á árinu og gekk vel á mótum sumarsins.
Hákon Birkir Grétarsson og Hildur Helga Einarsdóttir fengu framfararbikar 14 ára og yngri en þau sýndu gríðarlega miklar framfarir á árinu í sínum greinum.
Afreksmenn 14 ára og yngri að þessu sinni eru tveir, þeir Pétur Már Sigurðsson og Kolbeinn Loftsson. Báðir þessir drengir eru mjög fjölhæfir frjálsíþróttamenn og í gríðarlegri framför.
Í meistarahóp voru einnig veitt verðlaun. Harpa Svansdóttir og Jónína Guðný Jóhannsdóttir eru handhafar framfarabikars Frjálsíþróttadeildar Selfoss að þessu sinni.
Afreksmaður Frjálsíþróttadeildar Selfoss árið 2014 er Thelma Björk Einarsdóttir og náði hún góðum árangri á frjálsíþróttavellinum. Hún stundaði æfingar af kappi allt árið og uppskar eftir því . Thelma Björk leggur aðallega stund á kastgreinar og eru hennar aðalgreinar sleggjukast og kringlukast auk þess sem hún tekur í kúluna af og til. Thelma varð Íslandsmeistari í kringlukasti í sínum aldursflokki á MÍ 15 – 22 ára sem haldið var á Selfossvelli sl. sumar. Þar sigraði hún með yfirburðum með sitt lengsta kast á árinu, 33,61 m sem er góð bæting . Hún vann svo til bronsverðlauna í kringlukasti á MÍ fullorðinna í Kaplakrika um miðjan júlí með kast upp 32,16 m.
Verðlaunahafar á aðalfundinum. Frá vinstri eru Jónína Guðný, Dýrleif Nanna (fyrir framan), Thelma Björk, Harpa, Hákon Birkir, Hjalti Snær, Kolbeinn, Dominic Þór og Hildur Helga. Á myndina vantar Pétur Má. Ljósmynd: Umf. Selfoss/Gissur Jónsson