Hamar mun mæta Aftureldingu í einvígi um Íslandsmeistaratitilinn í blaki karla. Hamar sigraði KA í þriðju viðureign liðanna í undanúrslitunum í kvöld.
Staðan í einvígi Hamars og KA var 1-1 fyrir leikinn í kvöld og ljóst að tapliðið í kvöld væri komið í sumarfrí. Leikurinn var æsispennandi lengst af og ljóst að bæði lið ætluðu sér sigur.
Fyrsta hrina var hnífjöfn og skiptust liðin á um að ná forystu þar til Hamar jafnaði 23-23 og vann svo hrinuna 25-23.
Aðra hrinu byrjuðu heimamenn af kappi og náðu strax 4 stiga forystu. Þá vöknuðu KA menn og náðu að hanga í Hamarsmönnum en komust aldrei yfir og Hamar vann hrinuna 25-20.
Þriðja hrina var hnífjöfn og spennandi og jafnt á mörgum tölum. Heimamenn reyndust þó sterkari á lokasprettinum þrátt fyrir harða baráttu KA manna. Lokatölur 25-22 og 3-0 heimasigur Hamars staðreynd.
Stigahæstur í liði Hamars var Tomek Leik með 13 stig en í liði KA var það Miguel Mateo Castillo með 15 stig.
Í hinni undanúrslitaviðureigninni sigraði Afturelding Vestra 2-0 og það verða því Hamar og Afturelding sem munu berjast um Íslandsmeistaratitilinn. Fyrsti leikur liðanna er á miðvikudag kl. 19:30 í Hveragerði.