Karlalið Hamars í blaki er úr leik í áskorendakeppni Evrópska blaksambandsins, eftir tap gegn VC Limax frá Hollandi í kvöld í Digranesi í Kópavogi.
Hamarsmenn töpuðu fyrri leiknum ytra 3-0 og það var því á brattannn að sækja fyrir heimamenn í kvöld. Hamarsmenn börðust þó hetjulega og voru allar hrinurnar jafnar og spennandi og munaði minnstu að Hamar næði að knýja fram oddahrinu.
Lokatölur urðu 3-1 eftir frábæran blakleik og Hamarsmenn geta vel við unað eftir frumraun sína í áskorendakeppninni.
Jafnar og spennandi hrinur
Fyrsta hrinan leiksins var jöfn og spennandi en VC Limax var þó með frumkvæðið allan tímann og vann hrinuna að lokum 22-25. Hamar byrjaði aðra hrinu betur en tapaði forystunni um miðja hrinuna, jafnaði svo aftur 19-19 og 20-20. Gestirnir áttu svo lokasprettinum og unnu hrinuna 25-20.
Hamarsmenn byrjuðu þriðju hrinuna vel og komust í 6-2. Hollendingarnir komust svo yfir 17-16 en Hamarsmenn gáfust ekki upp og jöfnuðu 22-22 og knúðu svo fram 23-25 sigur. Í fjórðu hrinunni hafði Hamar frumkvæðið framan af en um hana miðja snerist hún gestunum í vil. Svo fór að lokum að Limax vann hrinuna 25-23 og leikinn þar með 3-1 og Hamarsmenn eru þar með úr leik í keppninni.