Lokahóf handknattleiksdeildar Selfoss fór fram með seinni skipunum í þetta skiptið í sumarblíðu í Hótel Selfoss á laugardagskvöldið 11. júní.
Guðfinna Tryggvadóttir var valin félagi ársins en Guðfinna hefur verið mjög öflug í kringum meistaraflokk kvenna í vetur og haldið utan um framkvæmd heimaleikja liðsins ásamt því að hugsa vel um stelpurnar. Einnig hefur unnið sjálfboðaliðastörf í kringum leiki hjá u-liði karla og hjá meistaraflokki karla.
Roberta Stropé var valin besti leikmaður meistaraflokks kvenna. Hergeir Grímsson var valinn besti leikmaður meistaraflokks karla. Þá var Tryggvi Sigurberg Traustason valinn besti leikmaður U-liðsins auk þess að vera markakóngur liðsins. Tinna Sigurrós Traustadóttir var valin efnilegasti leikmaður, var markadrottning og sóknarmaður ársins, en Ísak Gústafsson var valinn efnilegastur karlamegin.
Einar Sverrisson var valinn varnarmaður ársins ásamt því að vera markakóngur þá var Tinna Soffía Traustadóttir valin varnarmaður ársins kvennamegin. Atli Ævar Ingólfsson var sóknarmaður ársins og baráttubikarinn fengu þau Richard Sæþór Sigurðsson og Elínborg Katla Þorbjörnsdóttir.
Einnig voru veittar viðurkenningar fyrir leikjafjölda. Viðurkenningu fyrir 100 leiki fengu þau Atli Ævar Ingólfsson, Ragnar Jóhannsson, Tryggvi Þórisson, Alexander Hrafnkelsson, Katla Björg Ómarsdóttir, Jósef Geir Guðmundsson (liðsstjóri) og Þórir Ólafsson (þjálfari). Fyrir 200 leiki spilaða fyrir Selfoss fengu viðurkenningar þeir Hergeir Grímsson, Einar Sverrisson, Jón Birgir Guðmundsson (sjúkraþjálfari) og Örn Þrastarson (þjálfari).
