Vonir KFR um sæti í úrslitakeppni 5. deildar karla í knattspyrnu urðu nánast að engu í kvöld þegar liðið tapaði gegn toppliði Mídasar á útivelli.
Hjörvar Sigurðsson kom KFR yfir strax á 5. mínútu en þremur mínútum síðar urðu Rangæingar fyrir því óláni að skora sjálfsmark. Mídasarmenn röðuðu síðan inn þremur mörkum á stuttum kafla undir lok fyrri hálfleiks og staðan var 4-1 í hálfleik.
Seinni hálfleikurinn var markalaus allt þar til tvær mínútur voru eftir af leiknum. Hjörvar skoraði þá sárabótarmark fyrir Rangæinga og lokatölur leiksins urðu 4-2.
KFR er í 4. sæti B-riðilsins með 26 stig. Liðið þarf að vinna báða leiki sína sem eftir eru og treysta á að Hörður og Smári misstígi sig á lokasprettinum. Smáramenn þyrftu reyndar að misstíga sig all harkalega því liðið hefur talsvert betra markahlutfall en KFR.