Ofurhlaupararnir og vinirnir Börkur Reykjalín Brynjarsson og Gunnar Viðar Gunnarsson hlupu af stað í morgun klukkan 6:00 en í dag ætla þeir að hlaupa 104 kílómetra í áheitahlaupi til styrktar Píeta samtökunum.
Þeir félagar hlaupa vegalengdina á 400 metra hlaupabrautinni á Varmárvelli í Mosfellsbæ. Nokkrir hlaupafélagar þeirra voru mættir í morgun til að hlaupa með þeim og fleiri munu bætast í hópinn í dag. Með hlaupinu er ætlunin að vekja áhuga á og styrkja starfsemi Píeta samtakanna eins og fyrr segir.
Táknrænt að hefja hlaupið í myrkrinu
„Það má segja að það sé táknrænt að hefja hlaupið í myrkrinu í morgun og hlaupa á móti deginum,“ sagði Þórir Erlingsson sem aðstoðar þá félaganna utan brautar í að láta viðburðinn ganga. En aðstaða til hlaupa í dag eru mjög þorralegar, þrettán metrar á sekúndu og þriggja stiga frost.
Hlaupararnir hlaupa 8 km á hverjum klukkutíma og taka nokkurra mínútna hlé í lok hvers klukkutíma. „Við hvetjum sem flesta til að koma og hlaupa með okkur,“ segir Börkur. Í þeim tilgangi hefur verið hafin sala á hverri klukkustund á í vefverslun Píeta samtakanna. Þar geta þeir sem áhuga haf keypt eina klukkustund eða fleiri, en þetta er gert til að fylgja eftir þeim fjöldatakmörkunum sem eru í gildi.
„Með hlaupinu viljum við leggja okkar að mörkum til að vekja athygli á Píeta samtökunum og vonandi safna einhverjum peningum fyrir samtökin í leiðinni, enda eru þau algerlega rekin fyrir söfnunarfé og styrkjum,“ bætir Börkur við.
Þeir sem ekki hafa tök eða áhuga að hlaupa er bent á reikningsnúmer samtakanna fyrir frjáls framlög 0301-26-041041, kt. 410416-0690
Hvatningarleikur í Instagram Story
Píeta samtökin eru góðgerðasamtök sem sinna forvarnarstarfi gegn sjálfsvígum, sjálfsskaða og styðja við aðstandendur. Síðastliðið ár hefur álagið á samtökunum þrefaldast og nýtast allir styrkir beint í starfsemina. „Það er alltaf jafn gaman þegar fólk hugsar til okkar og finnur leiðir til minna á okkur og styrkja okkar starf,“ segir Inga María Hjartadóttir verkefna og kynningarstjóri Píeta samtakanna.
Börkur segir að fyrir þá félagana sér hreyfingin besta geðlyfið. „Þess vegna langar okkur til að hvetja fólk til að fara út og hreyfa sig og taka þátt í hvatningarleik,“ segir Börkur. Leikurinn er þannig uppbyggður að þátttakendur taka mynd af sér við útiveru eða hreyfingu og pósta á Instagram Story merkt @BRBADV og @PIETASAMTOKIN. Dregið verður um frábæra vinninga frá Hraunsnef Sveitahótel, Bætiefnabúllunni, OTSport, Hlaupár, Víkingamótunum, Progastro og fleirum.
Nánari upplýsingar má finna á heimasíðu Barkar og á Facebook.
