Örn Guðnason og Hrönn Jónsdóttir voru sæmd gullmerki UMFÍ á sambandsþingi UMFÍ sem haldið er um helgina að Laugarbakka í Miðfirði.
Þau sitja bæði í stjórn UMFÍ en gefa ekki kost á sér til áframhaldandi stjórnarstarfa, en kosið verður í nýja stjórn á þinginu. Hrönn er 33 ára og á meðal yngstu ungmennafélaga sem hlotið hafa gullmerki UMFÍ í rúmlega 110 ára sögu ungmennafélagshreyfingarinnar.
Örn hefur verið varaformaður UMFÍ síðastliðin fjögur ár. Hann var ritari stjórnar UMFÍ 2007-2011 og 2013-2015 og varaformaður frá 2015-2019 og hefur því setið í 12 ár í stjórn UMFÍ. Þá sat Örn í sex ár sem varaformaður í stjórn HSK og framkvæmdastjóri Ungmennafélags Selfoss 2006-2013.
Hann hefur setið í fjölda framkvæmdanefnda landsmóta og annarra nefnda fyrir hreyfinguna. Þá var hann framkvæmdastjóri HSS árin 1982-1983. Örn kemur frá Hvolsvelli, ólst upp í Ungmennafélaginu Baldri og var formaður þess árin 1978-1980. Hann situr í stjórn Íslenskrar Getspár og í Íþróttanefnd ríkisins fyrir hönd UMFÍ.
Hrönn er ritari UMFÍ og hefur setið í stjórn UMFÍ síðastliðin sex ár. Hún var fyrst meðstjórnandi 2013-2015 og tók svo við ritarastöðu stjórnar 2015-2019.
Hrönn er úr Lundarreykjadal í Borgarfirði og ólst þar upp í ungmennafélagsumhverfi og var meðal annars framkvæmdastjóri UMSB um tíma. Nú er Hrönn flutt á Suðurland og býr þar með fjölskyldu sinni í Háholti í Skeiða- og Gnúpverjahreppi.
Haukur Valtýsson, formaður UMFÍ, afhenti þeim viðurkenninguna og bætti við Hrönn muni örugglega eitthvað láta til sín taka meðfram búskapnum á Suðurlandi.
„Ég vil ítreka þakkir ungmennafélagshreyfingarinnar til þessara einstaklinga og tel að leitun sé að fólki sem eru jafn miklir ungmennafélagar og þau. Um leið óska ég þeim velfarnaðar í því sem þau taka sér fyrir hendur,‟ sagði Haukur.
