Ingvar Ómarsson og Ágústa Edda Björnsdóttir sigruðu í fjallahjólakeppninni Rangárþing Ultra, sem fram fór í þriðja sinn síðastliðinn föstudag.
Keppnin er samstarfsverkefni Rangárþings eystra og Rangárþins ytra og hefur skipað sér sess hjá mörgu hjólreiðafólki á Íslandi.
Keppnin fór vel fram og voru viðbrögð keppenda og aðstandenda jákvæð og hefur umfjöllun um keppnina verið gríðarlega góð, enda lék veðurblíðan við keppendur og allir komu heilir í mark.
Vegna þurrka undanfarnar vikur í sveitarfélögunum reyndist brautin vera nokkuð strembnari en oft áður. Til að mynda var sandurinn við Helluvað og meðfram Þingskálavegi torfær svo hjólin skrikuðu hjá sumum og keðjur fóru undan hjá öðrum, þó flestir hafi farið í gegnum brautina án skakkafalla. Sérstaða keppninnar er að leiðin, sem er um 50km löng milli Hellu og Hvolsvallar, kemur aldrei inn á þjóðveg 1.
Veitt voru verðlaun í fjórum flokkum, bæði karla og kvenna. Heildarúrslit fyrir besta tíma í braut voru þessi:
Konur:
1. Ágústa Edda Björnsdóttir 01:46:12
2. Björk Kristjánsdóttir 01:50:30
3. Hrefna Sigurbjörg Jóhannsdóttir 01:56:11
Karlar:
1. Ingvar Ómarsson 01:29:51
2. Birkir Snær Ingvason 01:32:36
3. Eyjólfur Guðgeirsson 01:33:43
Alls tók 101 keppandi þátt í keppninni og vonast keppnishaldarar til þess að þeir verði ennþá fleiri þegar keppnin verður haldin 12. júní 2020.
Mótshaldarar vilja þakka Sláturfélagi Suðurlands fyrir myndarlegan stuðning við keppnina en einnig Ungmennafélaginu Heklu, Björgunarsveitinni Dagrenningu, Flugbjörgunarsveitinni Hellu, starfsmönnum sveitarfélaganna sem og öðrum sem lögðu hönd á plóg, fyrir sína aðkomu.
