Selfoss heldur toppsætinu í 2. deild karla í knattspyrnu þrátt fyrir jafntefli gegn Víkingi í Ólafsvík í toppslag deildarinnar í kvöld.
Víkingar komust yfir á 17. mínútu og reyndist það eina mark fyrri hálfleiks. Staðan í leikhléi var 1-0 en Jón Vignir Pétursson var fljótur að breyta stöðunni í seinni hálfleiknum.
Selfoss fékk víti á 54. mínútu þegar markvörður Víkings braut á Aroni Vokes innan teigs, Jón Vignir steig á punktinn og skoraði af öryggi. Hann var aftur á ferðinni fjórum mínútum síðar, Selfoss fékk þá hornspyrnu, boltinn barst út í miðjan vítateiginn og þar hamraði Jón knöttinn í netið af stuttu færi.
Leikurinn var í járnum í kjölfarið en á 88. mínútu áttu heimamenn góða sókn sem lauk með því að knötturinn lá í netinu hjá Selfyssingum. Bæði lið komu sér í góðar stöður á lokamínútunum en mörkin urðu ekki fleiri og 2-2 jafntefli niðurstaðan.
Eftir fjórar umferðir er Selfoss í toppsætinu með 10 stig en Víkingur er í 2. sæti með 8 stig, ásamt Ægi og Haukum.
Það er leikið þétt þessa dagana en næsti leikur Selfoss er heimaleikur gegn Þrótti Vogum næstkomandi fimmtudag.