Stokkseyringar hófu leik í Lengjubikar karla í knattspyrnu í gærkvöldi þegar liðið tók á móti KÁ á gervigrasinu á Selfossi.
Það varð snemma ljóst að Stokkseyringar þyrftu að standa af sér mörg áhlaup þetta kvöldið og þegar upp var staðið hafði KÁ skorað sjö mörk gegn engu.
Gestirnir komust yfir á 11. mínútu og þeir skoruðu svo tvívegis um miðjan fyrri hálfleikinn. Aftur komu tvö mörk með stuttu millibili undir lok fyrri hálfleiks og staðan var 0-5 í hálfleik.
Seinni hálfleikurinn var öllu rólegri en KÁ bætti við tveimur mörkum á síðustu tuttugu mínútunum og lokatölur urðu 0-7.
Stokkseyri leikur í C-deild Lengjubikarsins og mætir næst Létti á Selfossvelli þann 23. febrúar.