Knattspyrnufélag Rangæinga heimsótti Afríku í Breiðholtið í Reykjavík í 5. deild karla í knattspyrnu í kvöld.
Rangæingar höfðu mikla yfirburði í leiknum og staðan var 0-3 í hálfleik eftir að Þórbergur Egill Yngvason hafði skorað tvívegis og Hákon Kári Einarsson eitt mark.
Aron Birkir Guðmundsson bætti fjórða marki KFR við á upphafsmínútum seinni hálfleiksins en Afríka minnkaði muninn í 4-1 um hann miðjan. KFR lokaði hins vegar leiknum með fimm mörkum á fimmtán mínútum undir lokin. Hjörvar Sigurðsson og Gísli Ísar Úlfarsson skoruðu sitt hvort markið á meðan Helgi Valur Smárason hlóð í þrennu og lokatölur leiksins urðu 1-9.
KFR er komið í toppsæti riðilsins um stundarsakir, með 21 stig, en Mídas og Smári sem eru í 2. og 3. sæti eiga leik til góða á Rangæingana.