Kolbrún Katla Jónsdóttir, kraftlyftingakona frá Lyngholti, var valin íþróttakona Flóahrepps árið 2023 en verðlaunin voru afhent á hátíðinni Fjör í Flóa í byrjun júní.
Kolbrún Katla hóf að æfa kraftlyftingar haustið 2021 og æfir og keppir fyrir hönd Kraftlyftingadeildar Breiðabliks, ýmist í unglingaflokki, þar sem hún er á síðasta ári, eða opnum flokki sem er allur aldur.
Kolbrún náði strax góðum tökum á íþróttinni og náði eftirtektarverðum árangri á sínu fyrsta móti vorið 2022. Hún átti mjög gott kraftlyftingarár árið 2023 þegar hún varð Íslandsmeistari á opnu móti í sínum þyngdarflokki í mars, keppti á heimsmeistaramóti unglinga í september og á Evrópumeistaramóti unglinga í október. Á öllum þessum mótum stóð hún sig frábærlega og hreppti fjölda verðlauna. Hún hefur haldið áfram að bæta sig jafnt og þétt og hefur þegar tryggt sér keppnisrétt á heimsmeistaramóti unglinga í september og Evrópumeistraramóti unglinga í október. Einnig hefur hún tryggt sér lágmörk á HM og EM í fullorðinsflokki.
Fanney fékk sérstaka viðurkenningu
Í ár ákvað íþrótta-, æskulýðs- og menningarnefnd Flóahrepps einnig að veita sérstaka viðurkenningu fyrir óeigingjarnt starf í þágu íþótta- og æskulýðsmála í sveitarfélaginu og hlaut Fanney Ólafsdóttir á Hurðarbaki þann heiður.
Fanney hefur tekið virkan þátt í ungmennafélags- og íþróttastarfi frá unga aldri. Hún var 17 ára gömul þegar hún kom fyrst inn í stjórn Umf. Vöku og var síðan formaður félagsins í sjö ár. Fanney var svo ritstjóri Áveitunnar um árabil og sat sem slíkur í stjórn Vöku og síðan Umf. Þjótanda frá stofnun félagsins. Fanney tók við formennsku í Umf. Þjótanda árið 2021 og gegndi því starfi þar til nú í ár. Fanney var í stjórn HSK frá 2006-2015, fyrst sem varamaður og svo sem meðstjórnandi.
Hún er búin að vera formaður starfsíþróttanefndar HSK lengur en elstu menn muna og ötull keppandi í frjálsum íþróttum og starfsíþróttum í gegnum tíðina. Hún hefur fengið fjölda viðurkenninga fyrir störf sín t.d. silfurmerki HSK, starfsmerki UMFÍ og silfurmerki ÍSÍ. Fanney er hefur staðið að lagningu gönguskíðabrautar í nafni Þjótanda undanfarin ár, fyrst með heimasmíðaðri græju til að gera gönguskíðaspor. Aukalega við íþrótta- og æskulýðsstarf er hún virkur meðlimur í kvenfélagsstörfum og lætur aldrei eftir sér að hjálpa til við hina ýmsu viðburði.