Algjör metskráning er í utanvegahlaupið Hengil Ultra sem haldið er í Hveragerði um helgina en fjöldi keppenda nálgast nú 400 og koma þeir allstaðar frá úr heiminum.
Fyrir utan metfjölda þátttakenda þá eru keppendur frá 18 þjóðlöndum skráðir til leiks.
Keppendurnir koma frá Bandaríkjunum, Kanada, Nýja Sjálandi, Belgíu, Hong Kong, Póllandi, Frakklandi, Sviss, Þýskalandi, Svíþjóð, Litháen, Hollandi, Slóveníu, Finnlandi, Noregi, Rúmeníu, Slóvakíu og auðvitað Íslandi.
Ofurmennin ræst á föstudagskvöld
Hundrað kílómetra hlaupararnir verða ræstir klukkan 20:00 á föstudagskvöldið fyrir framan Skyrgerðina í Hveragerði og geta allir sem hafa áhuga á að sjá alvöru ofurmenni með berum augum komið og fylgst með ræsingunni. Þeir hlauparar hlaupa svo í gegnum nóttina og verða að koma í mark milli 14:00 og 18:00 daginn eftir.
Fimmtíu kílómetra hlaupararnir ræsa klukkan 8:00 á laugardagsmorgun og svo tuttugu og fimm kílómetrarnir klukkan 13:00 og 10 og 5 kílómetra hlaupararnir klukkan 14:00. Það verður því mikið húllumhæ alla helgina í Hveragerði þar sem öflugustu utanvegahlauparar landsins og þó víða væri leitað koma saman og taka á því.
Hengill Ultra er lengsta utanvegahlaup á Íslandi býður þó uppá sex mismunandi keppnisleiðir og möguleika. 100 kílómetra, 50, 25, 10 og svo 5 kílómetra en síðan er 4 sinnum 25 kílómetra boðhlaup sem nýjung í mótinu í ár. Þannig er 25 kílómetra braut Hengils Ultra í sjálfum hlaup í gegnum Reykjadalinn, þá fallegu náttúrperlu og upp að Ölkelduhnjúk og í kringum hann. Þá hlaupa leið segja gárungarnir að sé eina utanvega hlaupa leiðin í heiminum með innbyggðum heitum pottum.
Þeir sem hafa áhuga á að keppa á næsta ári geta unnið sér inn þátttökurétt með því að vera sjálfboðaliðar í ár. Þeir sem skila fimm tímum í brautargæslu, klapplið, drykkjarstöð, flöguafhendingu eða upplýsingagjöf fá sjálfboðaliðapoka með bol mótsins og allskyns smá gjöfum frá samstarfsaðilum, gjafakort á Hamborgarafabrikkuna og fría skráningu í Hengill Ultra Trail 2020 – vegalengd að eigin vali. Áhugasamir geta sent póst á info@hengillultra.is