Í kvöld fór fram þriðja keppniskvöld Suðurlandsdeildar Cintamani í hestaíþróttum. Þrettán lið, 52 knapar og í boði voru 195 skeiðsprettir, hvorki meira né minna.
Úrslit kvöldsins voru á þá leið að efst eftir forkeppni í flokki áhugamanna var Sophie Dölschner á Fleyg frá Syðra-Langholti og í flokki atvinnumanna Elvar Þormarsson á Djáknari frá Selfossi. Að loknum úrslitum var það svo ljóst að þau höfðu innsiglað sigurinn.
Það var lið Árbæjarhjáleigu/Hjarðartúns sem var sigurvegari kvöldsins en þau stóðu efst í liðakeppninni með 88 stig. Knapar þeirra enduðu í 2. og 6. sæti í flokki atvinnumanna og 5. og 7. sæti í flokki áhugamanna.
Að loknum þremur greinum er staðan sú að lið Nonnenmacher leiðir enn með 249,5 stig, rétt á hæla þeirra kemur lið Árbæjarhjáleigu/Hjarðartúns með 247 stig og þá lið Vöðla/Snilldarverks/Sumarliðabæjar með 218,5 stig.
Það er ansi mjótt á munum og nóg af stigum eftir í pottinum en á lokakvöldinu, þann 18. apríl, verður keppt í tveimur greinum, tölti og skeiði.
