Haustmót Glímusambands Íslands fór fram á Laugum í Sælingsdal síðastliðinn laugardag. HSK átti samtals níu keppendur í barna-, unglinga- og fullorðinsflokkum og unnu þau til 15 verðlauna og voru þar af fimm gullverðlaun.
Marín Laufey Davíðsdóttir keppti í opnum flokki kvenna og +75 kg kvenna og sigraði hún báða flokka á meðan Heiðrún Fjóla Pálsdóttir lenti á eftir henni í öðru sæti í báðum þessum flokkum. Gústaf Sæland keppti einnig í tveim flokkum og sigraði hann -84 kg flokk karla en gerði sér þriðja sætið að góðu í opnum flokki karla.
Jóhannes Pálsson nældi sér í þrenn silfurverðlaun en hann keppti í +74 kg unglingaflokki karla, +84 kg flokki karla og opnum flokki. Í hópnum var svo afmælisbarn en Óskar Freyr Sigurðarson varð 17 ára á mótsdegi og hann náði sér í tvenn bronsverðlaun þar sem hann keppti í bæði +74 kg unglingaflokki og í +84 kg flokki karla.
Af öðrum keppendum er það að segja að Björgvin Guðni, bróðir Óskars Freys, lenti í öðru sæti í flokki 15 ára drengja. Tveir drengir náðu sér svo í gullverðlaun en Gísli Svavar Sigurðarson í flokki 13 ára drengja og Torfi Guðjón Nílsson í flokki 12 ára drengja lentu báðir í fyrsta sæti. Síðustu verðlaunin vann svo Kristín María Sigurðardóttir en hún varð í þriðja sæti í 11 ára flokki stelpna. Glæsilegur árangur hjá þeim á fyrsta móti vetrarins og má með sanni segja að glíman fari vel af stað hjá Skarphéðni.
Næsta mót er svo Iceland Open en þar er keppt í glímu og hryggspennu í unglinga- og fullorðinsflokkum. Mótið verður haldið helgina 26. -27. október í Vogum á Vatnsleysuströnd en hægt er að fylgjast með mótum og viðburðum Glímusambands Íslands á Facebook og Instagram.
Fyrir alla áhugasama um glímu er gaman frá því að segja að það eru æfingar á nokkrum stöðum á Suðurlandi og hægt að nálgast allar upplýsingar á samfélagsmiðlum og á heimasíðu sambandsins.