Handknattleikskonan Perla Rut Albertsdóttir og júdómaðurinn Sigurður Fannar Hjaltason hafa verið valin íþróttakona og íþróttakarl Umf. Selfoss árið 2024. Verðlaunin voru afhent á verðlaunahátíð Umf. Selfoss sem fram fór í félagsheimilinu Tíbrá í kvöld.
Perla Ruth var burðarás í liði Selfoss sem bar sigur úr býtum í Grill 66 deildinni á síðasta tímabili og tryggði sér sæti í Olísdeildinni. Hún hefur einnig verið fastamaður í íslenska landsliðinu á árinu og lék með því á Evrópumótinu í nóvember og desember.
Sigurður Fannar hampaði Íslandsmeistaratitli í +100 kg flokki á árinu auk þess sem hann tók gull á Haustmóti JSÍ og silfur á Vormóti JSÍ. Hann hefur með einbeitni og ástundun til margra ára uppskorið ríkulega árið 2024. Hann hefur lagt mikið á sig og veitir öðrum innan deildarinnar hvatningu til árangurs.
Sex karlar og sex konur voru tilnefnd í kjörinu af deildum ungmennafélagsins og tóku þau við viðurkenningum á verðlaunahátíðinni.
Við sama tækifæri var Gunnar B. Guðmundsson sæmdur gullmerki Umf. Selfoss en hann vann um árabil afar óeigingjarnt starf fyrir félagið, m.a. sem formaður knattspyrnuráðs félagsins á sjöunda áratug síðustu aldar og þá var hann formaður handknattleiksdeildar á fyrra gullaldartímabili félagsins upp úr 1990.