Metþátttaka var í Hreyfiviku UMFÍ sem fram fór dagana 29. maí til 4. júní. Í ár stóðu boðberar hreyfingar í Hreyfivikunni fyrir 490 viðburðum í sextíu bæjarfélögum um allt land og tók 43.000 manns þátt í viðburðunum. Þátttakendur hafa aldrei verið fleiri.
Sundkeppni sveitarfélaga er liður í Hreyfiviku UMFÍ og var hún nú haldin í þriðja sinn. Í sundkeppninni tóku 29 sveitarfélög þátt og var synt í 34 sundlaugum um allt land. Syntir voru samtals 3.215 kílómetrar.
Sundlaugargestir á Hellu tryggðu sér toppsætið annað árið í röð en þeir syntu sem svarar til 453 metrum á hvern íbúa í Rangárþingi ytra. Í öðru sæti í keppninni voru nágrannar þeirra í Rangárþingi eystra sem syntu sem svarar til 180 metra á hvern íbúa. Skaftárhreppur varð svo í 3. sæti með 133 m á hvern íbúa. Fjórða sunnlenska sveitarfélagið í topp tíu var Ölfus sem varð í 6. sæti með 80 m á hvern íbúa.
Ungmennafélag Íslands hefur staðið fyrir Hreyfiviku UMFÍ síðan árið 2012. Þetta er samevrópskt lýðheilsuverkefni sem hefur það að markmiði að hvetja fólk til að finna sína uppáhalds hreyfingu og stunda hana í 30 mínútur að lágmarki á hverjum degi.