Sebastian Alexandersson varð þriðji Selfyssingurinn til að hljóta sæti í heiðurshöll Selfoss handbolta, en þar komast aðeins þeir sem hafa spilað með félaginu í 10 ár eða meira.
Sebastian var heiðraður í leikhléi á fyrsta leik Selfoss og FH í undanúrslitaeinvíginu um Íslandsmeistaratitilinn.
Sebastian kom til Selfoss árið 2003 sem spilandi þjálfari og lék með liðinu til ársins 2015. Hann kom á fót og stýrði akademíu félagsins og var viðloðandi þjálfun yngri flokka. Hann tók þátt í því að endurvekja meistaraflokk kvenna og þjálfaði liðið frá 2010-2017. Basti spilaði 161 leik fyrir Selfoss á árunum 2003 til 2015 og skoraði í þeim tvö mörk.
Eins og allir sem þekkja Sebastian vita lagði hann líkama, hjarta og sál í verkefnið og er svo sannarlega vel að þessum heiðri kominn.
Þrír leikmenn eru nú í heiðurshöllinni, Sebastian, Hörður Bjarnarson og Ramunas Mikalonis. Ljósmynd/Jóhannes Eiríksson