Selfoss vann sætan sigur á ÍR í fyrsta leik liðanna í sex liða úrslitum Íslandsmóts kvenna í handbolta í Set-höllinni á Selfossi í kvöld, 31-27.
Selfoss hafði frumkvæðið framan af í fyrri hálfleik en ÍR jafnaði 9-9 þegar átján mínútur voru liðnar og gestirnir komust yfir í kjölfarið. Selfyssingar voru hins vegar á miklu flugi undir lok fyrri hálfleiks og náðu að snúa leiknum aftur sér í vil, 16-14 í hálfleik.
ÍR jafnaði 17-17 í upphafi seinni hálfleiks og allt stefndi í spennuleik. En Selfyssingar voru alls ekki á sama máli. Þær juku forskotið aftur og voru mun meira sannfærandi á lokakafla leiksins þar sem ÍR átti engin svör.
Það lið sem fyrr vinnur tvo leiki tryggir sér sæti í undanúrslitum Íslandsmótsins og liðin mætast næst í Breiðholtinu á laugardaginn kl. 16:15.
Hulda Dís Þrastardóttir og Harpa Valey Gylfadóttir voru markahæstar Selfyssinga með 7 mörk, þar af skoraði Hulda 6 af vítalínunni. Sara Dröfn Ríkharðsdóttir skoraði 6, Katla María Magnúsdóttir og Arna Kristín Einarsdóttir 5 og Elínborg Katla Þorbjörnsdóttir 1. Ágústa Tanja Jóhannsdóttir átti góðan leik í marki Selfoss og varði 14/1 skot.