Sextán grunnskólamet voru slegin á Grunnskólamóti Árborgar í frjálsum íþróttum sem haldið var á Selfossi í síðustu viku.
Alls tóku 188 keppendur í 1.-10. bekk Vallaskóla, Sunnulækjarskóla og Barnaskólanum á Eyrarbakka og Stokkseyri þátt í mótinu.
Teitur Örn Einarsson, Vallaskóla, sló þrjú grunnskólamet í flokki 9.-10. bekkjar, í kúluvarpi, spjótkasti og langstökki. Hann sigraði í öllum fjórum greinunum í sínum flokki. Andrea Vigdís Victorsdóttir, Vallaskóla, sigraði einnig í öllum greinum í sínum flokki og setti grunnskólamet í spjótkasti í flokki 9.-10. bekkjar.
Harpa Svansdóttir, Vallaskóla, setti grunnskólamet í langstökki í flokki 7.-8. bekkjar og sigraði í öllum fjórum greinunum.
Í flokki 5.-6.bekkjar sigraði Barbára Sól Gísladóttir, Vallaskóla, bæði í 60 m hlaupi og kúluvarpi þar sem hún setti nýtt grunnskólamet. Katharína Sybylla Jóhannsdóttir, Vallaskóla, sigraði í langstökki og setti um leið nýtt grunnskólamet. Þá sigraði Viktor Ísar Stefánsson, Sunnulækjarskóla, í kúluvarpi á nýju grunnskólameti.
Í flokki 1.-4. bekkinga fengu allir þátttökuverðlaun en átta grunnskólamet litu dagsins ljós hjá yngstu keppendunum. Í 4. bekk setti Hjalti Snær Helgason, Vallskóla, grunnskólamet bæði í langstökki og kúluvarpi og Eva María Baldursdóttir, Vallaskóla, setti grunnskólamet í langstökki.
Í 3. bekk settu Björn Jóel Björgvinsson, Vallaskóla og Sunna Maríanna Kjartansdóttir, BES, grunnskólamet í kúluvarpi og Hans Jörgen Ólafsson, Vallaskóla, setti grunnskólamet í langstökki.
Í 2. bekk setti Karólína Helga Jóhannsdóttir, Vallaskóla, grunnskólamet í langstökki og í 1. bekk setti Veigar Þór Víðisson, BES, grunnskólamet í langstökki.
Úrslit mótsins má sjá á heimasíðu Frjálsíþróttasambands Íslands www.fri.is undir liðnum mótaforrit.