Knattspyrnudeild Selfoss og sunnlenska hljómsveitin Stuðlabandið hafa undirritað þriggja ára samstarfssamning. Meistaraflokkslið karla og kvenna munu bera merki Stuðlabandsins framan á keppnistreyjum sínum næstu þrjú árin.
Stuðlabandið ættu allir Sunnlendingar að þekkja en hljómsveitin er ein sú allra vinsælasta á landinu um þessar mundir. Flestir meðlimir sveitarinnar léku með yngri flokkum Selfoss í knattspyrnu og því tenging þeirra við knattspyrnuna á Selfossi sterk.
„Við erum virkilega spenntir fyrir þessu samstarfi og erum mjög ánægðir að geta tekið þátt í starfinu með þessum hætti og stutt okkar fólk næstu árin. Svo hvetjum við auðvitað alla Sunnlendinga til að fjölmenna á völlinn í sumar og taka þátt með okkur,“ segir Marinó Geir Lilliendahl, trommari Stuðlabandsins.
Búningurinn verður formlega frumsýndur í kvöld þegar kvennalið Selfoss mætir til leiks í Bestu deildinni og leikur gegn Aftureldingu í Mosfellsbæ klukkan 19:15.
Meðfylgjandi myndir og myndband tók Fannar Freyr Magnússon, gítarleikari Stuðlabandsins, af leikmönnum meistaraflokkanna í nýju búningunum.
