Þrír Sunnlendingar verða í eldlínunni á CrossFit mótinu Wodapalooza sem hófst í Miami í Flórída í dag. Mótið er eitt stærsta CrossFitmót sem haldið er í heiminum ár hvert og því lýkur á sunnudag.
Ísland á þrjá keppendur í meistaraflokki á mótinu og svo skemmtilega vill til að þau eru öll Sunnlendingar.
Selfyssingurinn Bergrós Björnsdóttir keppir í einstaklingskeppni í meistaraflokki kvenna á mótinu. Bergrós verður 17 ára á þessu ári og var henni boðið að færa sig úr unglingaflokki yfir í meistaraflokkinn á mótinu en hún er ríkjandi Íslandsmeistari kvenna í CrossFit.
Hvergerðingurinn Björgvin Karl Guðmundsson frá Stokkseyri tekur þátt í liðakeppninni og það gerir Guðbjörg Valdimarsdóttir frá Hveragerði líka. Björgvin Karl er í liðinu Tres Leches ásamt þeim Patrick Vellner og Travis Mayer. Guðbjörg er í liðinu NGH ásamt þeim Nicole Crouch og Katie Brock.
Tveir aðrir Íslendingar keppa á mótinu; Breki Þórðarson keppir í flokki fatlaðra og Tindur Eliasen keppir í unglingaflokki 16-18 ára.