Héraðssambandið Skarphéðinn sigraði bæði í handknattleik kvenna og borðtennis á fyrsta keppnisdegi Landsmóts UMFÍ sem hófst á Selfossi í dag.
Tvö lið voru skráð í handknattleik kvenna og lagði HSK lið UMFN í hreinum úrslitaleik. Tinna Soffía Traustadóttir, fyrirliði HSK, var því fyrsti íþróttamaðurinn til að lyfta bikar á landsmótinu þegar hún tók við verðlaunum HSK fyrir stigakeppni kvenna í handbolta.
Þá sigraði HSK í samanlagðri stigakeppni karla og kvenna í borðtennis. HSK konur sigruðu í kvennaflokki þar sem Bergrún Linda Björgvinsdóttir varð landsmótsmeistari.
Keppni dagsins gekk vel fyrir sig en keppt var í skotfimi, handbolta, borðtennis og badminton en í síðastnefndu greininni varð lið HSK í 4. sæti.
Á morgun hefst íþróttakeppnin af fullum þunga, meðal annars frjálsíþróttakeppnin sem gjarnan er miðpunktur landsmótanna.