Um síðustu helgi fór fram Bikarmót í hópfimleikum í Ásgarði í Garðabæ. Fimleikadeild Selfoss átti þrjú lið á mótinu og unnu þau til tveggja bikarmeistaratitla.
Lið KK eldri keppti á föstudag. Strákarnir sem eru á aldrinum 10 til 14 ára stóðu sig vel á mótinu og uppskáru 4. sæti.
Á Hvítasunnudag kepptu 1. flokkur stúlkna og 1. flokkur mix og gerðu báðir hópar sér lítið fyrir og sigruðu sinn flokk og eru því bikarmeistarar 2021.
Mix liðið er afar ungt og efnilegt, skipað stúlkum og drengjum á aldrinum 13 til 18 ára. Liðið sigraði lið Hattar frá Egilsstöðum með 0,8 stiga mun. Þau hafa bætt töluvert við erfiðleika sinn frá síðasta tímabili og er gaman að sjá hvað þau hafa vaxið.
Stúlknalið Selfoss sýndi mikinn karakter í afar harðri keppni. Þær sýndu glæsilegar æfingar á öllum áhöldum og uppskáru sigur, 0,95 stigum á undan liði Gerplu sem hafnaði í 2. sæti. Liðið er skipað stúlkum á aldrinum 14 til 17 ára.
Þetta er í annað skiptið sem 1. flokkur stúlkna frá Selfossi hlýtur bikarmeistaratitil en sá fyrri kom fyrir 11 árum síðan og er því búið að bíða lengi eftir honum. Í frétt frá deildinni segir að titlarnir tveir séu stórsigur fyrir fimleikadeild Selfoss því þrátt fyrir aðstöðuleysi deildarinnar sem er farið að há starfinu allverulega sé árangurinn eftirtektarverður.
