Hlaupahópurinn Frískir Flóamenn hafa staðið fyrir tveimur stórskemmtilegum viðburðum á undaförnum vikum.
Fyrst var haldin nýr hlaupaviðburður á föstudaginn langa en það var „Bakgarðspíslin“ sem haldin var í Hellisskógi. Þá var hlaupin ákveðin vegalengd, 1,69km. á hverjum 15 mínútum. Hlauparar hvíldu sig frá því þeir kláruðu vegalengdina og þar til ræst var á ný. Þeir sem lengst fóru, hlupu 25 sinnum af stað og hlupu því samtals 42,25 km. eða heilt maraþon. Tuttugu og einn hlaupari tók þátt og þrír hlupu allan tímann. Þessi viðburður var haldinn með góðfúslegu leyfi sveitarfélagsins og Skógræktarfélags Selfoss og heppnist mjög vel. Veður var þokkalegt og skjólgott í skóginum að vanda.
Þann 1. maí var síðan haldið hið árlega Stúdíó Sport hlaup. Þá var keppt í 5 og 10 km vegalengdum og auk þess var samhliða haldið nýtt hlaup fyrir 12 ára og yngri, Huppu-krakkahlaupið. Alls tóku 85 þátt í lengri vegalengdunum og um 65 börn í krakkahlaupinu.
Í 5 km var Arnar Pétursson var fyrsti karl á tímanum 15:42 mín og Verena Karlsdóttir var fyrsta konan á tímanum 19:05 mín. Í 10 km hlaupinu sigruðu Hannes Björn Guðlaugsson á tímanum 38:32 mín og Fríða Rún Þórðardóttir á 42:45 mín.
Rúmlega tuttugu starfsmenn frá Frískum Flóamönnum unnu sjálfboðavinnu við hlaupið en næsta verkefni hópsins er brautarvarsla í Laugavegshlaupinu þann 16. júlí nk. Frískir Flóamenn hafa séð um hana um árabil ásamt félögum úr Björgunarfélagi Árborgar.
Frískir Flóamenn hvetja alla áhugasama hlaupara að taka þátt í æfingum og starfi hlaupahópsins. Æfingar eru opnar fyrir alla og án endurgjalds, á þriðjudögum og fimmtudögum kl. 17:15 og laugardögum kl. 10 og hefjast alltaf við Sundhöll Selfoss.
