Í morgun skrifuðu Ungmennafélagið Hekla og Rangárþing ytra undir nýjan þjónustusamning. Fyrri samningur rann út um síðustu áramót og hafa viðræður um nýja samninginn staðið yfir undanfarna 11 mánuði.
Nýi samningur er til rúmlega þriggja ára og rennur út í árslok 2027. Með honum styrkir Rangárþing ytra Heklu um 4 milljónir króna árlega en upphæðin tekur vísitölubreytingum. Þá mun Rangárþing ytra greiða Heklu upp eignarhlut félagsins í íþróttavellinum á Hellu að upphæð rúmlega 2,8 milljónir króna.
Í samningnum er einnig kveðið á um það að Hekla fái 25 þúsund krónur fyrir hvern unnin Íslandsmeistaratitil, sem og Norðurlanda-, Evrópu og heimsmeistaratitla. Þá fær Hekla einnig 25 þúsund krónur fyrir hvert sæti í landsliði.
Ákvæði um að Heklu beri skylda til þess að sjá um sumarnámskeið barna í sveitarfélaginu hefur verið fellt úr samningnum og blasir því við að annað fyrirkomulag verði á sumarnámskeiðum árið 2025.
„Fyrir hönd félagsins viljum við þakka sveitarfélaginu fyrir samvinnuna við gerð nýs samnings. Það er álit félagsins að samningurinn sé mjög góður og komi til með að skila framförum fyrir íþróttastarf í sveitarfélaginu,“ segir Ástþór Jón Ragnheiðarson, formaður Heklu.