Haustfundur Glímuráðs HSK var haldinn í Selinu á Selfossi síðastliðinn miðvikudag. Þar lagði stjórn fram drög mótaskrá vetrarins og ákveðið var að halda Fjórðungsglímu á Hvolsvelli í nóvember, Grunnskólamót HSK í Reykholti í febrúar og héraðsglímu á Laugalandi í mars.
Jana Lind Ellertsdóttir, framkvæmdastjóri Glímusambandsins og varaformaður Glímuráðs, kynnti mótahald Glímusambandsins í vetur og fleiri verkefni sem eru framundan. Fram kom að næstu viðburðir Glímusambandsins eru Haustmót 5. október á Laugum í Sælingsdal, Iceland Open 26.-27. október í Vogum og æfingabúðir 15.-17. nóvember í Reykholti í Biskupstungum.
Fleiri mál voru rædd á fundinum og þar má nefna farandgripi HSK í glímu og nauðsyn þess að setja reglur um hvernig geyma eigi Skarphéðinsskjöldinn og Bergþóruskjöldinn á milli móta.
Á fundinum kom fram að nýtt félag á Selfossi hefur hafið starfsemi, Berserkir BJJ, en það mun sækja um aðild að HSK á næstu dögum. Fulltrúi félagsins, Egill Blöndal, mætti á fundinn og nefndi að félagið stefndi að því að bjóða upp á glímuæfingar fyrir börn og fullorðna þegar fram líða stundir.