Aldursflokkamót HSK í frjálsum 11-14 ára og Unglingamót 15-22 ára voru haldin í Selfosshöllinni síðastliðinn sunnudag. Alls mættu 47 keppendur frá sex félögum á aldursflokkamótið og 29 keppendur frá fjórum félögum hófu keppni á unglingmótinu.
Góður árangur náðist á báðum mótunum en margir þátttakendur bættu sinn árangur í fjölda greina og samkvæmt upplýsingum úr mótaforitinu voru samtals 131 persónuleg met bætt á mótunum.
Keppendur Selfoss unnu samtals 23 HSK meistaratitla á aldursflokkamótinu, Dímonarkeppendur unnu 10 titla, Þjótandi fjóra titla og Laugdælir unnu einn titil. Selfoss vann stigakeppni félaga á aldursflokkamótinu með samtals 373 stig. Dímon varð í öðru sæti með 145 stig og Þjótandi varð í þriðja með 77 stig.
Á unglingamótinu unnu keppendur Selfoss samtals 25 HSK meistaratitla, Garpur vann fjóra titla, Þjótandi tvo og Dímon vann einn titil. Selfoss vann stigakeppni unglingamótsins með yfirburðum, hlaut 341 stig, Þjótandi varð í öðru sæti með 38 stig og Dímon varð í þriðja sæti með 30 stig.
Heildarúrslit mótsins má sjá á heimasíðu Frjálsíþróttasambandsins.
