Skjálftinn, hæfileikakeppni ungmenna í grunnskólum á Suðurlandi, verður haldinn í fyrsta sinn laugardaginn 15. maí í íþróttahúsinu í Þorlákshöfn.
„Skjálftinn verður haldinn með öðru sniði en upphaflega stóð til vegna sóttvarnaráðstafanna. Í stað þess að þátttakendur hittist, eigi saman heilan dag og flytji atriði sín fyrir fullan sal af fólki, þá tekur UngRúv upp atriði frá hverjum skóla og setur saman í viðburð sem verður aðgengilegur á ungruv.is frá kl. 18 sunnudaginn 16. maí,“ segir Ása Berglind Hjálmarsdóttir, verkefnisstjóri Skjálftans.
„Með þessum hætti er hægt að taka upp hvert atriði án þess að stefna öllum ungmennunum saman með tilheyrandi aukinni hættu á þessum furðutímum heimsfaraldurs. Úrslitin verða tilkynnt “live” á Skjálfta Instagramminu sunnudagskvöldið 16. maí kl. 20 þegar formaður dómnefndar, Salka Sól, afhendir farandverðlaunagripinn til fyrsta sigurliðs Skjálftans,“ bætir Ása Berglind við.
Að þessu sinni er keppnin fyrir grunnskóla í Árnessýslu en á næsta ári stendur til að bjóða fleiri skólum á Suðurlandi þátttöku.
„Það eru átta skólar úr Árnessýslu sem verða með atriði og það eru ungmennin sjálf sem hafa búið þau til frá grunni, útfært, æft, hannað búninga, hárgreiðslur og hvaðeina sem þarf til þess að láta hugmynd að sviðslistaverki verða að veruleika. Markmiðið með Skjálftanum er að bjóða ungmennum upp á verkefni sem eflir sköpunargáfu, þjálfar þau í markvissu langvinnu hópastarfi sem styrkir sjálfsmynd einstaklinga og hefur jákvæð áhrif á skólamenningu. Skjálftinn er samfélagslegt verkefni með sjálfbærni að leiðarljósi, búinn til með það að markmiði að hafa jákvæð áhrif á samfélag og menntun ungmenna,“ segir Ása Berglind ennfremur og vill hún koma á framfæri þökkum til skólastjórnenda fyrir ánægjulegt samstarf, SASS, List fyrir alla og Sveitarfélaginu Ölfusi fyrir stuðninginn og síðast en ekki síst þátttakendum fyrir mikla þrautseigju og jákvæðni á ansi hreint krefjandi tímum.
Skjálftinn verður semsagt aðgengilegur á UngRúv og eru allir hvattir til að horfa á hann klukkan 18, sunnudaginn 16. maí og fylgjast svo með á Skjálfta Instagramminu kl. 20 sama dag þegar Salka Sól afhendir sigurliðinu farandverðlaunagripinn.
Nánari upplýsingar eru á skjalftinn.is, Facebook og Instagram síðu Skjálftans.
