Hr. Eydís sendi frá sér nýja ´80s ábreiðu í dag. Þeir eru á rólegri nótunum en oft áður en lag dagsins er lagið Mad World með Tears for Fears.
Lagið kom út árið 1982 og var þeirra fyrsta lag sem sló í gegn, fór hæst í 3. sæti breska vinsældalistans og bar hróður þeirra félaga út fyrir heimahagana.
Lengi höfðu þeir félagar í Tears for Fears ekki trú á laginu og lögðu til að það yrði B-hliðin á annarri smáskífu, en útgefandinn var á öðru máli. Sem betur fer því lagið er gott og hitti fólk í hjartastað. Já, það hitti beint í hjartastað því lagið er dimmt, drungalegt og tilfinningaríkt. Það hafa líka margir stórir listamenn tekið það upp á arma sína og gert ábreiðu af laginu. Lagið varð líka vinsælt á TikTok fyrir nokkrum árum og eignaðist þar nýja aðdáendur.
„Ætli megi ekki segja að þetta lag eigi vel við í dag? Heimurinn er orðinn frekar brjálæðislegur, en hefur líklegast alltaf verið það…,“ segir Örlygur Smári, söngvari og gítarleikari Hr. Eydís hugsi.